ಕುಂಬಾರರ ಸಂಸ್ಕೃತಿ ಬಿಂಬಿಸುವ ಕಾದಂಬರಿಗೆ `ಸರಸ್ವತಿ ಸಮ್ಮಾನ್‌’ ಪುರಸ್ಕಾರ


samman

ನವದೆಹಲಿ(ಮಾ.೧೨): ಉತ್ತರ ಕನ್ನಡ ಜಿಲ್ಲೆಯ ಕಾರವಾರ ಬಳಿಯ ಮಾಜೋಳಿ ಮೂಲದ ಕೊಂಕಣಿಯ ಹಿರಿಯ ಸಾಹಿತಿ ಮಹಾಬಲೇಶ್ವರ್‌ ಸೈಲ್‌ ಅವರು ಪ್ರತಿಷ್ಠಿತ ಸರಸ್ವತಿ ಸಮ್ಮಾನ್‌ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಪುರಸ್ಕಾರ ರೂ.15 ಲಕ್ಷ ಬಹುಮಾನ, ಪ್ರಶಸ್ತಿ ಪತ್ರ ಹಾಗೂ ಸ್ಮರಣಿಕೆ ಒಳಗೊಂಡಿದೆ.

2009ರಲ್ಲಿ ಪ್ರಕಟಣಗೊಂಡಿರುವ ಕೊಂಕಣಿಯ ‘ಹಾಂವ್‌ಠಾಣ್ ’ ಕಾದಂಬರಿಗಾಗಿ ಅವರಿಗೆ ಈ ಪ್ರತಿಷ್ಠಿತ ಪುರಸ್ಕಾರ ನೀಡಲಾಗಿದೆ. ಗೋವಾದ ಸಾಂಪ್ರದಾಯಿಕ ಕುಂಬಾರ ಸಮುದಾಯದವರ ಸಂಸ್ಕೃತಿಯನ್ನು ಈ ಕಾದಂಬರಿಯಲ್ಲಿ ಚಿತ್ರಿಸಲಾಗಿದೆ. (ಹಾಂವ್‌ಠಾಣ್ ಅಂದರೆ ಕುಂಬಾರರ ಕುಲುಮೆ ಎಂದರ್ಥ. ಅದನ್ನು ‘ಆವಿಗೆ’ ಎಂಬ ಹೆಸರಿನಲ್ಲಿ ಕನ್ನಡಕ್ಕೆ ಶಾ.ಮಂ.ಕೃಷ್ಣರಾಯರು ಅನುವಾದಿಸಿದ್ದಾರೆ) ಕೊಂಕಣಿಯಲ್ಲಿ ಏಳು ಕಾದಂಬರಿಗಳನ್ನು ರಚಿಸಿರುವ ಸೈಲ್‌ ಅವರು ಮರಾಠಿಯಲ್ಲಿಯೂ ಸಾಹಿತ್ಯ ರಚಿಸಿದ್ದಾರೆ. ಮರಾಠಿಯಲ್ಲಿ ನಾಲ್ಕು ನಾಟಕಗಳನ್ನು, ಒಂದು ಕಾದಂಬರಿ ಹಾಗೂ ಐದು ಸಣ್ಣಕತೆಗಳನ್ನು ಅವರು ಬರೆದಿದ್ದಾರೆ.

Mahabaleshwar Sail

ಖೋಲ್‌ ಖೋಲ್‌ ಮೂಲನ್‌, ಅದೃಷ್ಟ, ಅರಣ್ಯಕಾಂಡ್‌, ಹತಾನ್‌, ಯುಗ್‌ ಸನ್ವರ್‌ ಹಾಗೂ ಕಾಳಿ ಗಂಗಾ ಸೇರಿದಂತೆ ಅವರ ಇತರೆ ಕಾದಂಬರಿಗಳಲ್ಲಿ ವಿವಿಧ ಸಾಮಾಜಿಕ ಸ್ತರಗಳಲ್ಲಿನ ಜೀವನ ಅನುಭವಗಳನ್ನು ಅಭಿವ್ಯಕ್ತಿಸಲಾಗಿದೆ. ‘ಪೆಲ್ತಾಡ್ಚೊ ಮನಿಸ್‌’: ಕೊಂಕಣಿ ಕಾದಂಬರಿ ಅದೇ ಹೆಸರಿನಲ್ಲಿ ಚಲನಚಿತ್ರವಾಗಿದೆ. 2006ರಿಂದ 2015ರ ಅವಧಿಯಲ್ಲಿ ಪ್ರಕಟಗೊಂಡಿದ್ದ ವಿವಿಧ ಭಾಷೆಗಳ 22 ಕೃತಿಗಳು ಸ್ಪರ್ಧೆಯಲ್ಲಿದ್ದವು. ನಿವೃತ್ತ ಮುಖ್ಯ ನ್ಯಾಯಮೂರ್ತಿ ಎ.ಎಸ್‌.ಆನಂದ್‌ ಅವರ ನೇತೃತ್ವದ ‘ಛಾಯನ್‌ ಪರಿಷತ್‌’ ಅಂತಿಮವಾಗಿ ಸೈಲ್‌ ಅವರ ಕೃತಿಯನ್ನು ಪ್ರಶಸ್ತಿಗೆ ಆಯ್ಕೆ ಮಾಡಿದೆ. 1993ರಲ್ಲಿ ಅವರು ಕೇಂದ್ರೀಯ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿಗೂ ಪಾತ್ರರಾಗಿದ್ದಾರೆ. 1965ರ ಭಾರತ–ಪಾಕಿಸ್ತಾನ ಯುದ್ಧದಲ್ಲಿ ಪಾಲ್ಗೊಂಡಿದ್ದ ಅವರು ಬಳಿಕ ಅಂಚೆ ಇಲಾಖೆಯಲ್ಲಿ ಸೇವೆ ಸಲ್ಲಿಸಿದ್ದರು. ನಿವೃತ್ತಿ ಬಳಿಕ ಗೋವಾದಲ್ಲಿ ವಾಸಿಸುತ್ತಿದ್ದಾರೆ.


[yuzo_related]

Leave a Reply

Your email address will not be published. Required fields are marked *